Yr Arbrawf Mawr
Yr Arbrawf Mawr 2009
Mae’r Arbrawf Mawr yn ôl, gyda rhagor o weithdai, alawon, caneuon, sesiynau, tiwtorialau … tri diwrnod o gerddoriaeth
yng nghwmni rhai o diwtoriaid gorau’r maes. Bydd dosbarth grŵp bob bore, gweithdai bob prynhawn, sgyrsiau, sesiynau a digon o amser i greu cerddoriaeth gyda’n gilydd.
Ble a phryd?
Mae Canolfan Ddarganfod Margam yn adeilad newydd sbon ‘gwyrdd’ ym Mharc Margam, rhwng Port Talbot a’r Pîl. (Gweler www.field-studies-council.org/margampark/)
Mae’r parc yn cynnwys bryngaer o’r Oes Haearn, olion abaty Sistersaidd, amgueddfa Cerrig Celtaidd ac Orendy hardd sy’n dyddio o’r 18ed ganrif.
Bydd yr Arbrawf Mawr yn cychwyn ar y nos Iau (Hydref 29), pan fydd ein tiwtoriaid yn esbonio’r gwaith y byddant yn ei wneud; bydd y cwrs ‘go-iawn’ yn dechrau ar ôl brecwast ddydd Gwener.
Yn y bore ...
Offerynnwr?
Byddwch yn ffocysu ar chwarae mewn ensemble offerynnau cymysg, dysgu ar y glust, ehangu eich repertoire a datblygu’ch techneg. Bydd gwahanol grwpiau i siwtio gwahanol lefelau gallu, yn amrywio o lefel y ‘sesiwn araf’ hyd at y cerddor o safon uwch.
Canwr?
Byddwch yn dysgu ac yn arbrofi gyda chaneuon traddodiadol Cymraeg, yn ogystal â mynychu gweithdai harmoni a datblygu’r llais. Bydd ddosbarthiadau i Gymry Cymraeg ac i’r rhai ohonoch sy’ newydd i’r iaith.
Yn y prynhawn ...
Bob prynhawn byddwn yn cynnig ystod o weithgareddau dewisol; darlithiau, gweithdai offerynnol, ymarfer mewn grwpiau bach, syniadau da i wneud â pherfformio, sgiliau technegol. Bydd y pynciau i`w ceisio yn gynnwys
`Dwylo ar delyn`,
clocsio gyda Huw Williams,
consertina gyda Marcus,
Robert Evans yn siarad ar `Cymru a`r Gynghanedd Nefol`,
Dan KilBride gyda chymorth ymarferol i gerddorion acwstig sydd am chwarae gyda mwyhad,
Guto Dafis ar Dribannau Morgannwg,
Chwedleua gyda Esyllt Harker a Mair Tomos Ifans,
a gweithdy llais i`r rhai sy`n dilyn y cwrs offerynnol yng ngwersi`r bore.
Gyda’r nos ...
Bydd cymysgedd o sesiynau, o’r araf i’r datblygedig, yn ogystal â chorneli tawel ar gyfer gweithgareddau penodol, Cyngerdd y Tiwtoriaid, Canu Mawr a Dawns Fawr, a Noson Lawen i’r rhai sydd am berfformio.
Beth yw’r gost?
Tan Medi 30, bydd y gyfradd breswyl yn amrywio o £120 (pris gostyngol, rhannu ystafell) i £240 (pris llawn, ystafell sengl). Mae ‘en suite’ gan bob ystafell. Mae opsiynau rhatach fyth i Arbrofwyr sy’n aros mewn carafan neu sy’n ddi-breswyl. Mae’r pris yn cynnwys bwyd ac hyfforddiant. Ond cofiwch: bydd prisiau’n CODI o £20 wedi Medi’r 30ain. 
| Tiwtor gwadd arbennig: Brian Finnegan o Flook
Yn ffliwtydd a chwibanoglwr gyda’r grŵp chwedlonol Flook, Brian yw ein tiwtor gwadd arbennig eleni, ac fe fydd yn arwain dosbarth y myfyrwyr lefel uwch
Gweler www.myspace.com/briantfinnegan |
| Robin Huw Bowen (tiwtor)
Croeso’n ôl i’r telynor teires Robin Huw. Unwaith eto bydd cerddorion lefel
canolradd ar unrhyw offeryn yn cael y cyfle prin i ddysgu oddiwrth feistr traddodiad Cymreig y delyn.
Gweler www.teires.com |
| Robert Evans (tiwtor)
Y ffidlwr ac arbenigwr crwth Bob Evans fydd yn cynnig ei ddysg a’i gyfoeth o brofiad fel athro a chwareuwr i’n hail grŵp canolradd.
Gweler www.bragod.com |
| Mair Tomos Ifans (tiwtor)
Cantores, actores a chwedleuwraig o fri, mae Mair yn enwog am addasu caneuon gwerin ar gyfer yr oes sydd ohoni. |
| Neil Browning (tiwtor)
Ein tiwtor lefel Sylfaen yw’r arweinydd clwb alawon a’r aml-offerynnwr hynaws Neil o
Never Mind The Bocs a Cajuns Denbo
Gweler www.neilandmeg.com |
| Esyllt Harker (tiwtor)
Bydd Esyllt, tiwtor Llais Naturiol, yn cyflwyno caneuon Cymru i’r di-Gymraeg ac i ddysgwyr yr iaith.
Gweler www.bodyandvoice.co.uk |
Eich barnau ar BEAM 2008 ...
“Rhywbeth at dant pawb ... Safon y tiwtoriaid – gwych!”
“Braf cael 3 noson i ddod i nabod pobl yn well yn ogystal â mwy o amser yn y gweithdai” ...
“Ardderchog – a chant a mil o ddiolch!! `
Dod ar y tren?
Gwybodaeth teithio (trenau)
Mae Trenau Arriva Cymru uniongyrchol i Bort Talbot o Gaerdydd, Casnewydd, Henffordd, yr Amwythig, Crewe and Manceinion, gyda chysylltiadau yng Nghaerdydd o dde a gorllewin Lloegr.
Ceir cysylltiadau Great Western mynych gyda Llundain Paddington, Reading, Swindon a Bryste Parkway (cysylltiadau o ogledd-ddwyrain Lloegr a Chanolbarth Lloegr) a Port Talbot.
Gwybodaeth am drenau Ymholiadau National Rail: 08457 48 49 50
Gwnawn ein gorau i gwrdd ag unrhywun sy`n dod ar y tren o orsaf tren Port Talbot, gyda threfniant blaenorol.
Ffurflen archebu
Cliciwch ar y ddolen i lawrlwytho mwy o fanylion, prisiau a.y.y.b., a`r ffurlen archebu. download file (17k)
Amserlen dros dro: 20 Hydref
Dyma`r fersiwn ddiweddaraf amserlen y dosbarthiadau, gweithdai ayyb. download file (16k)
|
